Сумын ИТХ-ын ээлжит 4 дүгээр
хуралдааныг 6 дугаар сарын 20-ний өдөр хуралдуулж дараах асуудлыг хэлэлцэн
шийдвэрлэв. Үүнд:
- Сумын мал аж ахуйн салбарыг тогтвортой хөгжлийн замд оруулан өрсөлдөх чадварыг нь дээшлүүлэх, нутаг дэвсгэрийн биологийн олон зүйлийг хадгалж хамгаалах, малчдын орлогыг тогтвортой өсгөн амьжиргааг нь баталгаажуулах зорилгоор Мөнххайрхан сумын мал аж ахуйн талаар баримтлах бодлогын хүрээнд хэрэгжүүлэх дунд хугацааны “Ухаалаг малчин” хөтөлбөр, “Сумын мал аж ахуйн эрсдэлийн сангийн үйл ажиллагааны журам”-ыг батлав.
- Сумын төвийн мал бүхий өрхөд тавигдах шаардлага, түүнийг зохицуулах журамд нэмэлт өөрчлөлт оруулж, "журмыг анх зөрчсөн бол торгож, учруулсан хохирлыг барагдуулан, удаа дараа зөрчсөн бол суурьшлын бүсэд малтай байх эрхийг хязгаарлана" гэсэн заалтыг нэмж, хэрэгжилтэнд хяналт тавьж, хэрэгжүүлэх талаар зохион байгуулалтын арга хэмжээ авч ажиллахыг сум, багийн Засаг дарга нарт үүрэг болгов.
- Байгалийн өвөрмөц тогтоц, унаган төрх, түүх соёлын дурсгалт зүйлийг хадгалан хамгаалж, ховор амьтан ургамал бүхий экологийн хувьд ач холбогдолтой зайлшгүй хамгаалах шаардлагатай тус сумын Сэнхэр, Хаг, Борт багийн нутаг дахь “Хүрэлдэй-Ханхайн нуруу” орчмын 54144.29 га газрыг Хүрэлдэй-Ханхайн нурууны тусгай хамгаалалттай газар болгон тогтоож, хамгаалалтанд байх хугацааг 2017 оны 06 дугаар сарын 20-ны өдрөөс эхлэн 20 жилийн хугацаагаар тогтоов.
- Хөх нуурын амралтын газрын үйл ажиллагааг тогтмолжуулах, орон нутгийн өөрийн орлого бүрдүүлэх зорилгоор амралтын газрын үйлчилгээний хураамжийн хэмжээг Дотоодын амрагчид гэрт байрлахад хоногт 5000, гадаадын амрагчид 10000, сумын иргэд 3000 төгрөгөөр тогтоож, мөн өдрөөс эхлэн мөрдөхөөр болов.
- Сумын 2017 оны төсөвт өөрчлөлт оруулах тухай илтгэлийг хэлэлцэн ОНХС-аар хэрэгжүүлэхээр батлагдсан ажил үйлчилгээ, төсөл арга хэмжээнээс 5560.0 мянган төгрөөөр хасах тодотгол хийж, Тусгай зориулалтын шилжүүлгийн байгууллагуудаас 12 жилийн сургуулийн хичээл практикийн зардал 130.0 мянган төгрөгөөр нэмэгдэж, Эрүүл мэндийн төвийн цалин, НДШ-ийн зардал 139,5 мянган төгрөгөөр хасагдаж, нийт дүнгээр 9.5 мянган төгрөгөөр бууруулж, 2016 оны эцэст зарцуулагдаагүй үлдсэн 684.2 мянган төгрөгийг орон нутгийн төсвийн суурь зардалд нэмж ЗДТГ-ын дутагдаж байгаа цалингийн сан болон урсгал засварын зардалд хуваарилж, Орон нутгаас төсөвт орох орлогыг 6000.0 мянган төгрөгөөр нэмж оруулан ИТХ-ын болон ЗДТГ-ын цалингийн санд олгох, Сум хөгжүүлэх сангийн дансны үлдэгдлээс 5248.8 мянган төгрөгийг холбогдох журмын дагуу эргэлтэнд оруулан зарцуулахаар тус тус батлав.
- Тус хуралдаанаар сумын 90 жилийн ойн хандивын бүрдүүлэлт, зарцуулалт, бүтээлч ажил, ойн бэлтгэл ажлын явцын тухай илтгэлийг хэлэлцэн цаашид хийж хэрэгжүүлэх ажлын талаар сумын Засаг даргад чиглэл өгөв.